ياللي نصحت الناس بشرب النبيت
مع بنت حلوة وعود وضحك وحديث
مش كنت تنصحهم منين يكسبوا
ثمن دا كله؟ والا يمكن نسيت
عجبي

إنشد يا قلبي غنوتك للجمال
وارقص في صدري من اليمين للشمال
ما هوش بعيد تفضل لبكره سعيد
ده كل يوم فيه ألف ألف احتمال
عجبي

أنا قلبي كان شخشيخة أصبح جَرس
جلجلت به صِحيُوا الخدم والحرس
أنا المهرج.. قمتو ليه خفتو ليه
لافْ إيدي سيف ولا تحت مني فرس
عجبي

حاسب من الأحزان وحاسب لها
حاسب على رقابيك من حبلها
راح تنتهي ولابد راح تنتهي
مش انتهت أحزان من قبلها
عجبي

أنا اللي بالأمر المحال اغتوي
شفت القمر نطيت لفوق في الهوا
طلته ما طلتوش ايه يهمني
مادام بالنشوة قلبي ارتوي