قصيدة “دين أبوهم اسمه إيه؟” للشاعر المصري جمال بخيت

دين أبونا يا مسلمين

في يقيني … أعز دين

كلمة النور الأمين … كلمة الحق المبين . ..

حكمة يكتبها الإله فوق جبين الطيبين

دين أبونا يا محمد … أنت سره ومبتداه . ..

أنت إحساسُه ومداه …

دقة عارفينها في قلوبنا لما نخشع للإله

لما نطلب يوم رضاه

لما نركع

لما نسجد

لما نفرح بالحياة

دين أبونا إبراهيم … رش جمر النار حنين …

ع الخرايط … والأماكن …

إتولدنا … طوافين … ذاكرين

دين أبويا لو مسيحي … رحمة للعالمين …

نُصرة لأجل المظلومين

كلمة الحب اللي بايس الصليب جُوَّا الكنايس ندهة الأجراس لمريم

والأمان للمجدلية

رحمة ليكو ورحمة ليا

المسيح شايل ألمنا لأجل يهدينا السلام . ..

خد أيمن خد أيسر

العبادة ماهيش كلام

عيش باسم الإنسانية وانسَ … نية تدفعك للانتقام

دين أبويا دين إلهي

أينما كان اتجاهي

حتي لو كان دين يهودي … إحنا مش ضد اليهود

موسي في القرآن وليد يحضنُه نيل الخلود

بين إديه تسعي عَصاتُه

حيَّه

وجدودنا شهود

سَحَرَا آمنوا بربِّ موسى

انقسملو بحر عاتي والجبل عرف السجود

رجعت الحيَّة عصايا

حضنت التوراة وصايا

إوعَ تقتل

إوعَ تسرق

إوعَ تزني

إوعَ تقبل بالخضوع

بحر خير الكون يواتي لما نفرد له القُلوع

والجحيم يأكل سنينكم

لو فقير فيكم يجوع

الوصايا هي هي

أرتضيها زي ما هي

في ضميري وفوق شفاهي

دين أبويا دين إلهي أينما كان اتجاهي

حتي لو كان مش إلهي

المجوسي يَترعَّب من نار ويعبد الإله اللي في خياله

ليه حرامو وليه حلاله

تسمعه في معبد دعاء

تلهمه رعشة رجاء

للبقر ناس يعبدوه و يدينو لو بالولاء

موش غباء

تعرفو في البقرة إيه بيقدسوه؟

العطاء

دين أبويا

أيِّ دين

فيه عُصاة أو مُخطئين

بس في نهاية المطاف

فيه ملائكة ومؤمنين

والرِّضى للصالحين

والهناء للصَّابرين

فيه ملاذ للعابدين الشاكرين المشتاقين رغم الضياع لليقين

دين أبويا أيِّ دين

اللِّي أنا بقي ما عرفُوش

الوُحوش الكُروش

اللِّي لو طالو رقابينا بينهشو ما بيرحموش

دين أبوهم اسمه إيه؟

اللِّي داسو فوق رؤوسنا بالبِيَادَة

اللِّي مشيو بالبلاد للبلادة

اللِّي فتاويهم فساد للعقل يقضي عَ العبادة

اللِّي مسحو من الآيات معني الشهادة

لوَّثُوا الدم في عروقنا سدوا عين الشمس فوقنا

سرقوا ضوءنا

صادروا نيلَنا ودفَّعونا تمن وضوئِنا

دين أبوهُم اسمُه إيه؟

اللِّي باعوا وطن بحاله خضرته وصفرة رماله

نسوته وشهوة رجاله بهجته ودمه وعياله

خطوته وسنين نضاله ثورته ضد احتلاله

دين أبوهم اسمُ إيه؟

مين إلهُه؟ مين رسولُه؟ فين كتابُه؟

فيه ملايكة و لا غابوا؟

فيه شياطين ولا تابوا لما شافوا التابعين شرهم زاد عن جهنم

شر لا يمكن حسابة؟

دين أبوهم اسمُه إيه؟

حتي فرعون اللِّي صدَّق

أنَّه من نسل الإله

واللِّي قال إنه الإله

كان بيبني الأهرامات للممات قبل الحياة

كان له بعث

ويوم حساب

كان له دولة

حضور إدارة كان منارة تُرشد الكون للحضارة

كان له جيش فارض وجودُه كان محارب بين جنودُه

ولما يتجاوز حدودُه كان له ربّ يغرقه وينقذ يهودُه

حتي فرعون اللِّي صدق إنه من نسل الإله

واللي قال إنّه الإله كان له كهنة في العلوم

يقروا في كِتاب الكواكب يرصدوا سير النُّجوم

يفتحوا لُو سكك بِيبَانْ في سراديب الزَّمان

ويقولوا إزَّاي يدوم

حنَّطُوه

خلَّدُوه

بالمعاني والمباني والرُّسوم

كانوا كهنة مؤمنين خلوا كلمة مصر دين

حاضرة في العهد القديم حاضرة في العهد الجديد

حاضرة في القرآن حضور

الآيات فيها تدور مفردةَ عِزٍّ وجلال مُعلَنة وبين السطور

تخترع ثانية وشهور

تخترع شعر وبحور حتي فلَّاحنا الفصيح

شكوتو بتشع نور

إيه يا مصر!

إيه يا أرض الطيِّبين!

اللِّي حكموا في الزمان دا يبقوا مين؟

دين أبوهم اسمُه إيه؟

حد يعرف فيكو دين كل أتباعُه لصوص

أو قوَّادين

في المعاصي مولودين في الكراسي مُؤبَّدين

في التَّفاهة معدودين في السَّفاهة مفروضين

ع البلاهة مسنودين للشراهة مجنَّدين

ع القرف متعوِّدين ع الشرف متمرِّدين

ع الوطن متنمرِدين بالخيانة موحِّدين

اللي يعرف دين كدا يقولي اسمُه إيه؟